එම නිවේදනය පහතින්,
මෙරට ඉතිහාසය මුහුණ දුන් බරපතළම ආර්ථික අර්බුදයෙන් රට ගොඩගෙන ස්ථාවරත්වයක් ඇති කර යළි ප්‍රගමනයේ මාවතට ගෙන ඒමට පසුගිය දෙවසර තුළ ජනාධිපති රනිල් වික්‍රමසිංහ මහතා මහඟු කාර්‍යභාරයක් සිදුකළ බව ජනාධිපති මාධ්‍ය අංශය නිවේදනය කරයි.
සෑම අංශයකින්ම බිඳ වැටී තිබූ මෙරට ආර්ථිකය පමණක් නොව, ස්ථාවරත්වය සහ ප්‍රගමනය වෙනුවෙන් අත්‍යවශ්‍ය සෑම ක්ෂේත්‍රයක්ම ආවරණය වන ආකාරය ජනාධිපතිවරයාගේ වැඩපිළිවෙලේ සමන්විත බවද ඔවුන් සඳහන් කරයි.
ආර්ථික පරිවර්තන පනත සම්මත කර ඉතිහාසයේ ප්‍රථම වතාවට, ජාතික සැලැස්මක්, ඉලක්කගත වැඩපිළිවෙළක් සහ වගවීමක් තුළ ආණ්ඩුකරණය සිදුවන තත්ත්වයක් ඇති කිරීම, රාජ්‍ය මූල්‍ය කළමනාකරණ පනත සම්මත කිරීම හරහා රටේ නිසි මූල්‍ය විනයක් ඇති කිරීම, නව පනත් සහ කෙටුම්පත් 83ක් සම්මත කිරීම සඳහා පාර්ලිමේන්තුවට ඉදිරිපත් කර මෙරට අත්‍යවශ්‍ය නීති ප්‍රතිසංස්කරණ සිදුකිරීම හා දූෂණය පිටුදැකීම වෙනුවෙන් ජාත්‍යන්තර ප්‍රමිතියෙන් යුතු ආසියාවේ බලගතුම දූෂණ විරෝධී පනත හඳුන්වාදීම, මෙරට ලක්ෂ 20ක ජනතාවට සින්නක්කර ඉඩම් ඔප්පු ලබාදීම සහ අඩුආදායම්ලාභී නාගරික මහල් නිවාස වාසීන්ට එම නිවාසවල සින්නක්කර අයිතිය ලබාදීම, සමෘද්ධිය මෙන් තුන් ගුණයක මූල්‍ය ප්‍රතිපාදන වෙන් කොට ආර්ථික අර්බුදය හමුවේ වැඩිම පීඩාවකට පත්වූ ලක්ෂ 27ක ජනතාවකට “අස්වැසුම” සුබසාධක ප්‍රතිලාභ වැඩසටහන දියත් කිරීම, ආර්ථික ඩිජිටල්කරණය ඇරඹීම එහි සුවිශේෂි තත්ත්වය බවයි සඳහන් වෙයි.
එසේම කාන්තාවන් සවිබල ගැන්වීමේ පනත හරහා කාන්තාවන් සහ ළමුන්ගේ සුරක්ෂිතභාවය තහවුරු කෙරෙන අතර, නව අධ්‍යාපන ප්‍රතිසංස්කරණ දියත් කිරීම , කෘෂි නවීකරණය, උතුරු නැගෙනහිර පළාත් සංවර්ධනය වෙනුවෙන් වැඩිම මුදල් ප්‍රමාණයක් යෙදවීම ඇතුළුව ජාතික සමගිය ඇතිකිරීම වෙනුවෙන් ක්‍රියාත්මක වැඩසටහන් රැසක් ක්‍රියාත්මක කිරීම, වතුකරයේ ජනතාවගේ දෛනික වැටුප් වැඩිකිරීම සහ නිවාස අයිතිය ලබාදීම හරහා ජීවන තත්ත්වය නැංවීම ද සිදු කරනලදි.
ඖෂධ හිඟය අවසන් කර රෝහල් ආශ්‍රිත යටිතල පහසුකම් නංවමින් බිඳ වැටී තිබූ සෞඛ්‍ය ක්ෂේත්‍රය යළි ශක්තිමත් කිරීම, බලශක්ති අර්බුදය සමනය කිරීම හා එහි පුනර්ජනනීය බලශක්තිය කෙරෙහි වැඩි නැඹුරුවක් ඇති කෙරෙන ව්‍යාපෘති ගණනාවක් ඇති කිරීම, දේශගුණික විපර්යාස සම්බන්ධයෙන් වන කතිකාව ජාත්‍යන්තර තලය දක්වා ගෙන යාම ඇතුළු සංවර්ධිත රටක් බිහිකිරීම වෙනුවෙන් ඉතිහාසයේ කිසිදු ආණ්ඩුවක් යටතේ සිදුනොවූ ඉමහත් කාර්‍යභාරයක් ගෙවුණු දෙවසරක කාලය තුළ සිදුකිරීමට ජනාධිපති රනිල් වික්‍රමසිංහ පාලනය සමත් වී තිබේ.
