කිසිවකුගේ නිසි අවධානයකට ලක් නොවීමෙන් කළුතර කැලිඩෝ වෙරළ තීරය විනාශ වී සංචාරක සහ ධීවර කර්මාන්ත දෙකම කඩාවැටී ඇති බවට එම ප්‍රදේශයේ ජනතාව චෝදනා නඟති.
දිනෙන් දින සිදුවන මුහුදු ඛාදනය හේතුවෙන් කැලිඩෝ සමාන්තර වෙරළ පාර සහ ආබෘ පාර මුහුදු වැලිවලින් යට වීමෙන් ප්‍රදේශයේ ගමනාගමනයටද බාධා එල්ල වී තිබේ.
පසළොස්වක පොහොය දිනය ආසන්න වන විට රළ පහරේ වේගය වැඩි වීමෙන් වෙරළ ආසන්නයේ ඇති නිවෙස් මෙන්ම, ඒ ආසන්නයේ පිහිටි නිල නිවාස සහ සංචාරක නිවාසද ජලයෙන් යටවන බව ඔවුහූ පවසති.
මේ වනවිට විශාල පොල්ගස් ප්‍රමාණයක් මුහුදු ඛාදනයට ලක්ව ඇති අතර, ඉතිරි ගස් කිහිපයද නුදුරේදී නියත වශයෙන්ම මුහුදට බිලිවීම වැළැක්විය නොහැක.
මීට වසර තුනකට පමණ පෙර පැවති රජය යටතේ හිටපු ඇමැතිවරයෙකුගේ මූලිකත්වයෙන් ධීවර ජනතාවගේ හඬට ඇහුම්කන් නොදී රුපියල් මිලියන 290ක් පමණ විනාශ කරමින් සංවර්ධන කටයුතු සිදු කිරීමෙන් වත්මන් තත්ත්වය උදාවී ඇති බව ද ඔවුහූ පවසති.
මේ පිළිබඳ අදහස් දැක්වූ ඩබ්ලිව්. ධර්මසේන මහතා,
උපන්දා සිට කළේ ධීවර රැකියාව. අපේ හඬට ඇහුම්කන් නොදී සිදු කළ මේ සංවර්ධනය නිසා ජනතා සල්ලි කෝටි ගණනක් විනාශ වුණා විතරක් නොවෙයි රැකියාත් අහිමි වී අපේ ජීවිතත් අසරණ වුණා.
යූ. චන්ද්‍රපාල මහතා,
මම වෙරළේ අච්චාරු විකුණලා ජීවත් වෙන්නේ. ඉස්සර කැලිඩෝ වෙරළට හවසට සහ නිවාඩු දවස්වල සෙනග උතුරනවා. දැන් එන්නේ තරුණ ජෝඩු පමණයි. එයාලත් යන්නේ කාමරවලට අද රුපියල් 400 අච්චාරු විකුණා ගන්න බැරිවුණා.
එල්.එච්. පද්මසිරි මහතා,
අවුරුදු 40ක් ධීවර රැකියාව කළා. එපා කියද්දි මෝය කැපුවා. මුහුදු ඛාදනයට ලක්වෙලා දැන් මේ ප්‍රදේශය බඹ 40ක් විතර ගැඹුරුයි. පොඩි මාළු එන්නේ නෑ. ඔරුවක් දාන්න බෑ. තව එහායින් මෝය කපලා ගල්වැටිය දාලා දුන්නා නම් මේ ගැටලුව විසඳෙනවා.
ධම්මිකා ශ්‍රියාලතා මහත්මිය,
ඉස්සර විදෙස් සංචාරකයින් පිරිලා. දැන් පාරේ යන්න බැරි නිසා සුද්දෙක් පළාතේ එන්නේ නෑ. අපරාදෙ සල්ලිත් විනාශ වුණා, අපේ ජීවිතත් විනාශ වුණා.
