උග්‍ර පානීය ජල අර්බුදයකට පත්ව සිටින රිදීමාලියද්ද ගල්බොක්ක පාසලේ සිසු දරුවන්ට සහ ගම්මානයේ පවුල් 300කට බදුල්ල රොටරි සමාජය මඟින් නොමිලේ ජලය ලබා දීම සඳහා ඉදි කළ ජල පිරිපහදු ඒකකය ජනතා අයිතියට පත් කිරීම පසුගියදා සිදු විය.
ලංකාවේ අති දුප්පත්ම ප්‍රාදේශීය ලේකම් කොට්ඨාසය වන රිදීමාලියද්ද, දෙහිගම ග්‍රාම නිලධාරී වසමට අයත් ගල්බොක්ක, යල්අරාව, හෙවන්වත්ත, පෙතියාගෙඩ, පොල් වගාව යන ගම්මානවල පවුල් සිය ගණනකට පිරිසිදු පානීය ජලය ගමට නොමැති නිසා ගම්මානයේ විශාල පිරිසක් වකුගඩු ඇතුළු නෙයෙකුත් ලෙඩ රෝගවලට ගොදුරුව සිටිති. ගම්මානයේ ජනතාව මේ වෙන කල් ගම්මානයේ ළිංවලින් පානීය ජලය ලබා ගැනීම සිදු කළත් සෑම වර්ෂයකම ජුනි, ජූලි, අගෝස්තු සහ සැප්තැම්බර් මාසවලදී ගම්මානයේ ජල උල්පත් සිඳී යන නිසා අවට තිබෙන මාදුරුඔය, කුඩා ඔය, හෑපොළඔය ඇතුළු ගංඟාවලින් ජලය පානය සඳහා ලබා ගැනීම සිදු කළත් එම ජලයට ගොවි බිම්වලට යොදන කෘමිනාශක මිශ්‍රව තිබෙන නිසා ජනතාව නොයෙකුත් ලෙඩ රෝගවලට ගොදුරු වී ඇත.
මෙම ගම්වාසීන් වසර ගණනාවක් තිස්සේ ගමට පිරිසිදු පානීය ජලය ලබා දෙන ලෙස දේශපාලකයින් ඇතුළු බලධාරීන්ගෙන් ඉල්ලා සිටියත් රොටරි සමාජය ගමට පැමිණ පිරිසිදු පානීය ජලය නොමිලේ ලබා දෙන තෙක්ම කිසිදු කෙනෙකු ගමට ජලය ලබා දීමට කටයුතු කර නැත. එම නිසාම බදුල්ල රොටරි සමාජයේ සාමාජිකයින් ගල්බොක්ක පාසලේ දරුවන් මූලික කර ගනිමින් ගම්මානයේ ජනතාවට නොමිලේ පැය විසි හතර පුරාම පානීය ජලය ලබා දීම සඳහා ගම්මානයේ තිබෙන කොටේකඳුර ජල උල්පතේ ළිඳක් ඉදිකර පාසලේ ජල පිරිපහදු ඒකකය ස්ථාපනය කර ජල පවිත්‍රාගාරය ඉදිකර තිබේ. බදුල්ල රොටරි සමාජයේ සභාපති චන්දිම කරුණා‍‍සේන මහතා ඇතුළු සියලුම සාමාජිකයින් ඇතුළු පිරිසක් පාසලට පැමිණ මෙම සද්කාර්යය සිදු කළ අතර විදුහල්පති ඒ.එම්.එස්. බණ්ඩාර මහතා ඇතුළු ගුරු මණ්ඩලය උත්සවය සංවිධානය කර තිබිණ.
