දරිද්‍රතාවය අවම කිරීම, ආහාර සහ පෝෂණ සුරක්ෂිතතාව ඉහළ නැංවීම සහ ස්වභාවික සම්පත් වැඩිදියුණු කිරීම සඳහා කැපවී සිටින ජාත්‍යන්තර ජල කළමනාකරණ ආයතනය සහ අන්තර්ජාතික කෘෂිකාර්මික පර්යේෂණ පිළිබඳ උපදේශක කණ්ඩායම සිය නිෂ්පාදන හවුල්කාරිත්වයේ 40 වැනි සංවත්සරය නිමිත්තෙන් මේ වසරේ ශ්‍රී ලංකාව තුළ නව වැඩසටහනක් දියත් කිරීමට පියවර ගෙන තිබේ.
අග්‍රාමාත්‍ය දිනේෂ් ගුණවර්ධන මහතා සහ අන්තර්ජාතික කෘෂිකාර්මික පර්යේෂණ පිළිබඳ උපදේශක කණ්ඩායමෙහි විධායක කළමනාකාර අධ්‍යක්ෂ ඉස්මහානේ එලෝවාෆි මෙනෙවිය සහ ජාත්‍යන්තර ජල කළමනාකරණ ආයතනයෙහි අධ්‍යක්ෂ ජනරාල් ආචාර්ය මාර්ක් ස්මිත් මහතා අතර හමුවක් අද අරලියගහ මන්දිරයේදී පැවැත්විණී.
කෘෂිකාර්මික නිෂ්පාදන, ධීවර හා කුකුළු මස් නිෂ්පාදන වැඩි කිරීමෙන් ග්‍රාමීය ජනතාවගේ අපනයන ව්‍යාපාර මෙන්ම පෝෂණය ඉහළ නැංවීමේ නව ක්ෂේත්‍ර පිළිබඳව සොයා බලන ලෙස අග්‍රාමාත්‍යවරයා නියෝජිත පිරිසගෙන් ඉල්ලා සිටියි.
අන්තර්ජාතික කෘෂිකාර්මික පර්යේෂණ පිළිබඳ උපදේශක කණ්ඩායමෙහි විධායක කළමනාකරණ අධ්‍යක්ෂ පැවසුවේ, ශීඝ්‍රයෙන් වෙනස් වන පසුබිමක් තුළ සාමාන්‍ය ව්‍යාපාරික ප්‍රවේශයන් විකල්පයක් නොවන අතර ඒ සඳහා නව ව්‍යාපාරික ප්‍රවේශයන්ගේ අදාළත්වය සහ බලපෑම වැඩි කරන්නේ කෙසේද යන්න පිළිබඳව සිය අවධානය තවදුරටත් යොමු කරන බවයි. ඒ අනුව එම සංවිධාන දෙක ශ්‍රී ලංකාවේ සංවර්ධන වැඩසටහන් සඳහා නව ක්‍රමවේදයක් යෝජනා කිරීමට නියමිතයි.
කුකුළු මස් හා බිත්තර නිෂ්පාදනය ඉහළ නැංවීම සඳහා කෙන්යාවේ සහ ඉතියෝපියාවේ ජාත්‍යන්තර පශු සම්පත් පර්යේෂණ ආයතනය සමඟ එක්ව අන්තර්ජාතික කෘෂිකාර්මික පර්යේෂණ පිළිබඳ උපදේශක කණ්ඩායම ඉතා සාර්ථක වැඩසටහනක් දියත් කර ඇති බවත්, එම රටවල සියලුම පාසල් දරුවන්ට ඔවුන්ගේ ආහාර වේල සමඟ දිනකට බිත්තරයක් මෙම සැලැස්ම යටතේ ලබා දෙන බවත් ඇය පැවසුවාය. එවැනි වැඩපිළිවෙළක් ශ්‍රී ලංකාව තුළ ද ක්‍රියාත්මක කළ හැකි බව ඇය සඳහන් කරයි.
