සති 06ක කාලයක් පුරා දිග හැරුණු එක්දින ලෝක කුසලාන තරගාවලියේ ඊයේ (19) රාත්‍රියේ ඕස්ට්‍රේලියාව ශූරතාව හිමිකර ගනිමින් අවසන් විය.

තරගාවලිය එලෙස අවසන් වීමෙන් අනතුරුව, මෙවර ලෝක කුසලාන කණ්ඩායම ජාත්‍යන්තර ක්‍රිකට් කවුන්සිලය විසින් මේ වනවිට නම්කර තිබේ.

ක්‍රීඩකයින් 11 දෙනෙකුගෙන් සමන්විත මෙම කණ්ඩායමට ශ්‍රී ලංකා ක්‍රීඩකයෙක් ද ඇතුළත්ව සිටීම විශේෂත්වයක්.

මෙම කණ්ඩායමේ නායකයා ලෙස නම්කර ඇත්තේ ඉන්දීය ක්‍රීඩක රෝහිත් ෂර්මායි.

දකුණු අප්‍රිකානු ක්‍රීඩක ක්වින්ටන් ඩි කොක්, ඉන්දීය සුපිරි පිතිකරු විරාත් කෝලි, නවසීලන්ත මුල්පෙළ පිතිකරු ඩැරල් මිචෙල්, ඉන්දීය පිතිකරු ලෝකේශ් රාහුල් මෙම කණ්ඩායමේ පිතිකරුවන් ලෙස නම්කර තිබේ.

තුන් ඉරියව් ක්‍රීඩකයින් ලෙස ඉන්දීය ක්‍රීඩක රවීන්ද්‍ර ජඩේජා සහ ඕස්ට්‍රේලියානු තුන් ඉරියව් ක්‍රීඩක ග්ලෙන් මැක්ස්වෙල් මෙම කණ්ඩායමට ඇතුළත් කර තිබේ.

වේග පන්දු යවන්නන් ලෙස ඉන්දීය වේග පන්දු යවන ක්‍රීඩක ජස්ප්‍රිත් බුම්රා, ශ්‍රී ලංකා යොවුන් ක්‍රීඩක ඩිල්ෂාන් මධුශංක සහ ඉන්දීය වේග පන්දු යවන ක්‍රීඩක මොහොමඩ් ෂාමි නම් කිරීමටයි කටයුතු කර ඇත්තේ.

ජාත්‍යන්තර ක්‍රිකට් කවුන්සිලය විසින් නම්කළ 2023 ලෝක කුසලාන කණ්ඩායමේ සිටින එකම දඟ පන්දු යවන්නා වන්නේ ඕස්ට්‍රේලියානු ක්‍රීඩක ඇඩම් සම්පා යි.

මෙම කණ්ඩායමේ 12 වන ක්‍රීඩකයා හෙවත් අතිරේක ක්‍රීඩකයා ලෙස දකුණු අප්‍රිකානු ක්‍රීඩක ජෙරල්ඩ් කෝට්සි නම්කර තිබෙනවා.