ලංකා විදුලිබල මණ්ඩලය ප්‍රතිව්‍යුහගත කිරීමට අදාළ යෝජනාව ලබන සතියේ අමාත්‍ය මණ්ඩලයට ඉදිරිපත් කිරීමට නියමිත බව විදුලිබල හා බලශක්ති අමාත්‍ය කංචන විජේසේකර මහතා පැවසීය.

මෙතෙක් මාස හයකට වරක් සංශෝධනය කෙරුණු විදුලි බිල මින් ඉදිරියට මාස 03කට වරක් සංශෝධනය කිරීමේ යාන්ත්‍රණයක් සකස් කරන බව ද අමාත්‍යවරයා සඳහන් කරයි.

විදුලිබල හා බලශක්ති අමාත්‍ය කංචන විජේසේකර මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (23) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය.

පසුගිය සතියේ මහජන උපයෝගිතා කොමිසම විසින් විදුලි ගාස්තු සංශෝධනය සඳහා විදුලිබල මණ්ඩලයට අනුමැතිය ලබා දෙනලදි. ඒ අනුව ඔක්තෝම්බර් 21 වනදා සිට, ඉදිරි මාස කිහිපය සඳහා පැවති ගාස්තු සංසන්දනය කර සියයට 18කට ආසන්න සංඛ්‍යාවකින් ගාස්තු සංශෝධනය ලදි.

මෙම මිල සංශෝධනය සඳහා රජයේ ප්‍රතිපත්තිය තීරණය වුණේ, ජාත්‍යන්තර මූල්‍ය අරමුදල සමඟ ඇතිකර ගත් ගිවිසුම අනුවයි. ඊට අනුව කිසිම රාජ්‍ය ව්‍යාපාරයක් මහාභාණ්ඩාගාරය මඟින් මුදල් ආයෝජනය කර එහි අලාභ පියවීමට හැකියාවක් නැහැ. ඒ අනුව විදුලිබල මණ්ඩලය සහ ඛණිජ තෙල් සංස්ථාව සඳහා විශේෂ මිල සූත්‍රයක් සකස් කරනලදි.

එසේම විදුලිබල මණ්ඩලයට ගාස්තු සංශෝධන කළ හැකි වන්නේ, අවුරුද්දට දෙවතාවක් පමණක් බවට සමාජයේ වැරදි මතයක් තිබෙනවා. නමුත් හදිසි අවස්ථාවලදී ගාස්තු සංශෝධන කරන ලෙස ඉල්ලීමේ හැකියාව විදුලිබල මණ්ඩලයට තිබුණා. කැබිනට් මණ්ඩලයේ අනුමැතිය මේ සඳහා හිමිවුණේ ඒ අනුවයි.

ඒ වගේම විදුලිබල මණ්ඩලයේ ප්‍රතිව්‍යුහගත කිරීමේ කාර්යය ගැනත් සඳහන් කළ යුතුයි. පසුගිය සමයේ ඒ සඳහා වන අපගේ යෝජනා නීති කෙටුම්පත් කාර්යාලයට ලබා දුන්නා‍. නීති කෙටුම්පත් කාර්යාලය එය සකස් කර නීතිපතිවරයාට යොමු කර තිබේ.

මෙම සතිය තුළ ඒ සඳහා අවශ්‍ය නිශ්කාෂණය ලබාදීම සඳහා කටයුතු කරන බව පසුගිය අඟහරුවාදා නීතිපතිවරයා විසින් මා වෙත දැනුම් දුන්නා. ඒ අනුව එලැඹෙන සතියේ එය කැබිනට් මණ්ඩලයට ඉදිරිපත් කර ප්‍රතිව්‍යුහගත කිරීමේ වැඩපිළිවෙල ඉදිරියට ගෙන යෑමට බලාපොරොත්තු වෙයි.

ඒ වගේම මේ වන විට අධික වැසි තත්ත්වයක් ඇතිව තිබෙන නිසා ගාස්තු සංශෝධනයක් අවශ්‍යද යන්න පිළිබඳව සමාජයේ මතයක් පවතිනවා. මම නියෝජනය කරන මාතර දිස්ත්‍රික්කය වගේම ඊට ආසන්න ගාල්ල දිස්ත්‍රික්කය ද ගංවතුර තත්ත්වයත් ගම්පහ දිස්ත්‍රික්කයත් ගංවතුර තත්ත්වයට මුහුණ දෙන ලදි.

නමුත් ජල විදුලිය නිෂ්පාදනය කරන සමනල වැව, වික්ටෝරියා සහ රන්දෙනිගල වැනි ප්‍රධාන ජලාශ තවමත් තිබෙන්නේ පැවති සීමාවලයි. අපි වෙනදට දකින වර්ෂාපතනය එම ප්‍රදේශවලට ලැබී නැ. අද වන විට ජලාශවල තිබෙන ධාරිතාවෙන් අපට භාවිතා කිරීමට හැකියාව ඇත්තේ 65.81%ක් පමණයි. නමුත් 2022 ඔක්තෝම්බර් මාසයේ 22 වනදා වනවිට ජලාශ වල පැවති ජල ධාරිතාවෙන් 84.41% භාවිත කිරීමට හැකියාව තිබුණා. මේ තත්ත්වය සංසන්දනය කිරීමේදී 20% ක පමණ පරතරයක පවතියි.

ඒ වගේම 2022 වර්ෂය වනවිට අපට අයත් ජලාශවලින් පමණක් ජල – විදුලිය ගිගාවොට් පැය 5364 ජනනය කර තිබෙනවා. 2021 වර්ෂයේ දී ගිගාවොට් පැය 5639ක් ජනනය කර තිබෙනවා. නමුත් මේ වසරේදී ඔක්තෝම්බර් මාසයේ 22 වනදා වන විට අප ජනනය කර ඇති ගිගාවොට් ප්‍රමාණය 2893ක් පමණයි. පසුගිය වර්ෂ දෙකට සාපේක්ෂව බැලුවහොත් මේ වසරේ ජනනය කර ඇත්තේ එම ප්‍රමාණයෙන් අඩක් පමණයි. මේ වසර අවසන් වීමට තවත් ඇත්තේ දින 70ක් පමණයි. දැන් එම ප්‍රදේශවලට වැසි ලැබුනත් එම ඉලක්ක සපුරා ගැනීමේ හැකියාවක් අපට තවමත් නැහැ. ඒ අනුව අවශ්‍ය විදුලිය ප්‍රමාණය සැපයීමට නම් විකල්ප වෙත යොමු වීමට සිදුවෙයි.