ශ්‍රී ලංකා නීති විද්‍යාලයේ විභාග ඉංග්‍රීසි මාධ්‍යයෙන් පමණක් පැවැත්වීමට නීති අධ්‍යයන සභාව ගත් තීරණයට අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ කටයුතු පිළිබඳ අමාත්‍යාංශයීය උපදේශක කාරක සභාවේදී එකඟත්වය හිමි නොවිණි.
අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ආචාර්ය විජේදාස රාජපක්ෂ මහතාගේ සභාපතීත්වයෙන් එම අමාත්‍යාංශයීය උපදේශක කාරක සභාව පසුගියදා රැස්වූ අවස්ථාවේදී මේ පිළිබඳව සාකච්ඡා විය.
ශ්‍රී ලංකා නීති විද්‍යාලයේ විභාග ඉංග්‍රීසි මාධ්‍යයෙන් පමණක් පැවැත්වීමේ අරමුණ කුමක්දැයි කමිටුවට පැමිණ සිටි නීති විද්‍යාල විදුහල්පති ආචාර්ය අතුල පතිනායක මහතාගෙන් මන්ත්‍රීවරු ප්‍රශ්න කළහ.
දැනටමත් නීති ක්ෂේත්‍රයේ සිටින බොහෝ දෙනෙක් සිය වෘත්තිය නිපුණත්වය ප්‍රකට කරන බවත් ඔවුන් කැමති භාෂාවකින් විභාගවලට පෙනී සිටීමේ නිදහස යටතේ නීති විද්‍යාල විභාගවලට පෙනී සිට ඇති බවත් මෙහිදී මන්ත්‍රීවරයන් කරුණු දැක්වූහ. එබැවින් තම මව් භාෂාවෙන් විභාගවලට මුහුණ දී සමත්වීම සිය වෘත්තිය නිපුණත්වය ප්‍රකට කිරීමට බාධාවක් නොවන බවත් මන්ත්‍රීවරයන් මෙහිදී පැවසූහ.
තවද, ප්‍රාථමික අධිකරණවල කටයුතුවලදී ප්‍රධාන වශයෙන් සිංහල සහ දෙමළ ප්‍රධාන භාෂාව භාවිත කරන බව කාරක සභා සාමාජිකයෝ පෙන්වා දුන්හ. ඉංග්‍රීසි භාෂාව භාවිත කරන්නේ අභියාචනාධිකරණය සහ ශ්‍රේෂ්ඨාධිකරණය පමණක් බවත් උතුරු නැගෙනහිර පළාත්වල සහ දෙමළ සහ මුස්ලිම් ජනයා බහුතරයක් වෙසෙන ප්‍රදේශවල අධිකරණ කටයුතු දෙමළ භාෂාවෙන් ද, සිංහල බහුතරයක් සිටින ප්‍රදේශවල අධිකරණ කටයුතු සිංහල භාෂාවෙන් ද සිදුවන බව පැමිණ සිටි මන්ත්‍රීවරු පෙන්වා දුන්හ.
බොහෝ ග්‍රාමීය ප්‍රදේශවල ඉංග්‍රීසි භාෂා අධ්‍යාපනයේ අඩුවක් පවතින බවත් ඉංග්‍රීසි භාෂාවෙන් විභාග අනිවාර්ය කිරීම මූලික අයිතිවාසිකම් උල්ලංඝනය කිරීමක් බවත් මන්ත්‍රීවරයන් මෙහිදී වැඩිදුරටත් පැවසූහ. මේ අනුව, ශිෂ්‍යයෙකුට තම මූලික භාෂාව වන තම මව් භාෂාවෙන් විභාගයට මුහුණ දීමේ නිදහස අවශ්‍ය බව කමිටුවේ අදහස විය.
මෙම තත්ත්වය තුළ ඉංග්‍රීසි භාෂාව අනිවාර්ය කිරීමට නීති අධ්‍යයන සභාව විසින් ගනු ලැබූ තීරණයට අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ කටයුතු පිළිබඳ අමාත්‍යාංශයීය උපදේශක කාරක සභාවේ එකඟත්වය හිමි නොවිණි.
නියෝජ්‍ය කථානායක අජිත් රාජපක්ෂ, විපක්ෂ නායක සජිත් ප්‍රේමදාස, අමාත්‍ය (ආචාර්ය) බන්දුල ගුණවර්ධන, පාර්ලිමේන්තු මන්ත්‍රීවරුන් රවුෆ් හකීම්, ඩිලාන් පෙරේරා, ගෙවිඳු කුමාරතුංග, වීරසුමන වීරසිංහ,බුද්ධික පතිරණ, උද්දික ප්‍රේමරත්න, සාගර කාරියවසම්, උදය ගම්මන්පිල, මොහොමඩ් මුසම්මිල්, උදයන කිරිඳිගොඩ, ලලිත් එල්ලාවල, ගාමිණී වලේබොඩ, (වෛද්‍ය) උපුල් ගලප්පත්ති, මධුර විතානගේ, ප්‍රේම්නාත් සී. දොලවත්ත, (මහාචාර්ය) චරිත හේරත්, ඉෂාක් රහුමාන්, එච්. එම්. එම් හාරීස්, එම්.එස්. තවුෆීක් යන මහත්වරු මෙම කාරක සභා රැස්වීමට සහභාගි වූහ.
