මහරගමදි පුද්ගලයෙකුට වෙඩි තබා ඝාතනය කිරිම සම්බන්ධයෙන් කොස්ගොඩ තාරකගේ ගෝලයෙකු මිරිහාන විශේෂ අපරාධ මෙහෙයුම් ඒකකය මගින් ඊයේ (11) අත්අඩංගුවට ගෙන තිබේ.

මෙසේ අත්අඩංගුවට ගෙන ඇත්තේ කිරිවත්තුඩුව ප්‍රදේශයේ පදිංචි ගගන චන්තක නැමැති තිස්පස් හැවිරිදි පුද්ගලයෙකි.

ඉකුත් පෙබරවාරි 21 වෙනි දින මහරගම,පන්නිපිටිය අරලිය උයනේදි යතුරුපැදියකින් පැමිණ පුද්ගලයෙකුට වෙඩිතබා පලා ගොස් තිබුණි.එකි ඝාතනයේ ප්‍රධාන සැකකරු වු මොහු කොස්ගොඩ තාරක සමග දුරකථනයෙන් සම්බන්ධ වි මෙම ඝාතනය කර ඇති බව විමර්ශන වලදි හෙලිව ඇත.

මොහු පිලියන්දල ,බෝකුන්දර විශේෂ ආර්ථික මධ්‍යස්ථානය අසලදි අත්අඩංගුවට ගෙන තිබු අතර ඝාතනය සඳහා යොදා ගැනුනු එම් එම් 9 බ්‍රවුනින් වර්ගයේ පිස්තෝලය, මැගසිනය හා එහි පතොරොම් 06 ක්ද සොයා ගෙන ඇත.

සැකකරු අද නුගේගොඩ මහේස්ත්‍රාත් අධිකරණය වෙත ඉදිරිපත් කෙරේ.