මෙරට කර්මාන්තකරුවන්ට අවශ්‍ය මූල්‍ය සහාය ලබා දීම වෙනුවෙන් නව සංවර්ධන බැංකුවක් ආරම්භ කිරීමට අපේක්ෂා කරන බවත් එමඟින් කර්මාන්තකරුවන්ට අඩු පොලියට ණය ලබා ගැනීමට අවස්ථාව සැලසෙන බවත් ජනාධිපති රනිල් වික්‍රමසිංහ මහතා පැවසීය.
ඒ කටයුතු ඉදිරියට ගෙනයෑම වෙනුවෙන් ආර්ථික කොමිසමක් ඇති කරන අතර සුළු හා මධ්‍ය පරිමාණ ව්‍යවසායකයන් ශක්තිමත් කිරීම වෙනුවෙන් “එන්ටර්ප්‍රයිස් ශ්‍රී ලංකා“ නමින් නව ආයතනයක් පිහිටුවන බව ද ජනාධිපතිවරයා පැවසීය.
ජනාධිපති රනිල් වික්‍රමසිංහ මහතා මේ බව සඳහන් කළේ ශ්‍රී ලංකාවේ ප්‍රථම වරට පැවැත්වෙන ඉන්ටනැෂනල් ඉන්ඩස්ට්‍රි එක්ස්පෝ 2024 (International Industry Expo 2024) ප්‍රදර්ශනය ඊයේ (19) පෙරවරුවේ විවෘත කරමිනි.
කර්මාන්ත හා සෞඛ්‍ය ඇමැති වෛද්‍ය රමේෂ් පතිරණ මහතාගේ උපදෙස් පරිදි කර්මාන්ත අමාත්‍යාංශයේ මෙහෙයවීමෙන්, කර්මාන්ත සංවර්ධන මණ්ඩලය විසින් සංවිධාන කළ මේ ප්‍රදර්ශනය අද සිට ජූනි 23 වැනි දින දක්වා බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ දී පැවැත්වේ.
විවිධ රටවල් නියෝජනය කරමින් ජාත්‍යන්තර කර්මාන්ත ව්‍යවසායකයන් මෙන්ම දේශීය මහා පරිමාණ හා මධ්‍ය පරිමාණ කර්මාන්තකරුවන් දහසකට අධික පිරිසක් මීට එක්ව සිටිති. මෙය ප්‍රදර්ශන කුටි 1307කින් සමන්විත අතර හරිත කර්මාන්ත කලාපයක් ලෙස වෙනම පරිශ්‍රයක් පළමු වරට ප්‍රදර්ශනයට එක් කර තිබීම විශේෂත්වයකි. මේ ප්‍රදර්ශන කාලයේ හරිත කර්මාන්තකරණය පිළිබඳ පර්යේෂණාත්මක විද්වත් සමුළුවක් ද පැවැත්වේ.
“ඉන්ටනැෂනල් ඉන්ඩස්ට්‍රි එක්ස්පෝ 2024” ප්‍රදර්ශනය විවෘත කළ ජනාධිපතිවරයා ප්‍රදර්ශනය නැරඹීමට ද එක් විය.
Ceylon Plaza පරිගණක යෙදුම හඳුන්වාදීම ද මීට සමගාමීව සිදු කෙරිණි.
අනතුරුව පැවති උත්සව සභාව අමතමින් ජනාධිපති රනිල් වික්‍රමසිංහ මහතා වැඩිදුරටත් මෙසේ පැවසීය. රටේ සංවර්ධනය වෙනුවෙන් ක්‍රියාත්මක කරන සෑම කටයුත්තකදීම අධිකරණයට යෑමට ඇතැමුන් පුරුදු වී ඇති බව කීය. එසේ කිරීමෙන් රට සංවර්ධනය කළ නොහැකි බවත්, ජාතික ප්‍රතිපත්තියක් ඔස්සේ රට ඉදිරියට ගෙන යා යුතු බවත් ජනාධිපතිවරයා අවධාරණය කළේය.
ජනාධිපති රනිල් වික්‍රමසිංහ මහතා මෙහිදී කළ සම්පූර්ණ කතාව මෙසේය.
ඇමැති රමේෂ් පතිරණ මහතා මෙරට කර්මාන්ත ක්ෂේත්‍රයේ සංවර්ධනය පිළිබඳ විශේෂ අවධානයකින් කටයුතු කරනවා. එහි එක් පියවරක් ලෙස මේ කර්මාන්ත ප්‍රදර්ශනය හඳුන්වාදිය හැකියි. මෙය මෙරට පැවැත්වෙන විශාලම ප්‍රදර්ශනයයි.
පසුගිය කාලයේ දී අප රට බංකොලොත් රටක් බවට පත්ව තිබුණා. නමුත් ඉදිරි සති කීපයේ අප බංකොලොත් රටක් යන ලේබලයෙන් සම්පූර්ණයෙන් නිදහස් වෙනවා. ඊට අදාළ ගිවිසුමට ද ඉදිරි සති කීපයේ එළැඹීමට නියමිතයි. මේ සමඟ පෞද්ගලික ණයකරුවන් සමඟ සාකච්ඡා කිරීමත් පහසුයි. එසේනම් වසර දෙකක කාලයකදී අප මේ කටයුත්ත කර තිබෙනවා.
නමුත් අපට මෙයින් සෑහීමකට පත් විය නොහැකියි. අප මේ ණය නැවත ගෙවන්නේ කොහොමද කියා අවධානය යොමු කළ යුතුයි. අප දීර්ඝ කාලයක් තිස්සේ ගත් ණය ආපසු ගෙවිය යුතුයි. ඒ සඳහා 2042 වසර වන තෙක් කාලය ලබා ගැනීමට බලාපොරොත්තු වෙනවා.
ඒ වගේම අප ආනයන ආර්ථිකයක් නිසා ආනයන වෙනුවෙන් මුදල් ගෙවිය යුතුයි. ඒ සඳහා අපට විදේශ විනිමය නැහැ. ඒ නිසා නැවත ණය ගැනීමට සිදු වෙනවා. මේ ක්‍රමය ක්‍රියාත්මක කළොත් තවත් වසර 15-20 කින් අපට නැවතත් ආර්ථික අර්බුදයකට මුහුණදීමට සිදු වෙනවා. ඒ නිසා අප අපනයන ආර්ථිකයක් බවට පරිවර්තනය වීමට කටයුතු කරමින් සිටිනවා.
අපනයන ආර්ථිකයක් කරා පරිවර්තනය වීමේදී නිෂ්පාදන ආර්ථිකයට ප්‍රධාන තැනක් හිමි වෙනවා. එහිදී නිර්මාණය වන ආර්ථිකය තරගකාරී මෙන්ම ඩිජිටල් ආර්ථිකයක් විය යුතුයි. ඒ වගේම කාබන් විමෝචනය ශූන්‍ය කිරීමේ ගෝලීය ඉලක්කය කරා ගමන් කිරීමේ දී හරිත ආර්ථිකයක් බවට ද අප පරිවර්තනය විය යුතුයි. මේ රාමුවේ අප කටයුතු කළ යුතුයි.
එහිදී පළමු කාර්යය ලෙස අප දැනට තිබෙන කර්මාන්ත ඒ සැලසුම් ඔස්සේ ඉදිරියට ගෙනා යුතුයි. එක රැයකින් කිසිවකුට තරගකාරිත්වයක් ඇති කරන්න බැහැ. අපේ අසල්වැසි රට වන ඉන්දියාවේ මේ වන විට විශාල කර්මාන්ත දියුණුවක් වෙමින් තිබෙනවා. තමිල්නාඩු, තෙලඟනා, ආන්ද්‍රා ප්‍රදේශවල ඒ දියුණුව ඇති වී තිබෙනවා. අපත් ඒ සමඟ සම්බන්ධ විය යුතුයි. ඒ වගේම ලෝකයේ අනෙකුත් රටවල් සමඟ මේ හා සම්බන්ධව කටයුතු කිරීමට අප බලාපොරොත්තු වෙනවා. ඒ නිසා පළමුව කළ යුත්තේ කර්මාන්ත තරගකාරී තත්ත්වයට ගෙන ඒමයි. ඒ පිළිබඳ රජයෙන් දිය යුතු සියලු සහයෝගය ලබා දීමට පියවර ගෙන තිබෙනවා.
මේ සඳහා අවශ්‍ය මුදල් සපයා ගැනීම වෙනුවෙන් සංවර්ධන බැංකුවක් ඇති කිරීමට අප සාකච්ඡා කරමින් සිටිනවා. 1960දී අපට DFCC බැංකුව තිබුණා. ඒ වගේම 1980දී NDB බැංකුව ආරම්භ කළා. පුද්ගලීකරණයෙන් පසු මේ බැංකු දෙකම අපේ රටේ තිබෙන ප්‍රධාන වාණිජ බැංකු බවට පත්ව තිබෙනවා. එදා මේ බැංකු නොතිබුණා නම් ප්‍රේමදාස ජනාධිපතිවරයාගේ ඇඟලුම් කර්මාන්ත ශාලා 200 වැඩසටහන සාර්ථක වන්නේ නැහැ. ඒ නිසා අලුත් බැංකුවක් ආරම්භ කිරීමට අප අපේක්ෂා කරනවා.
එහිදී පොලී අනුපාතය අඩු මට්ටමක තබාගත යුතුයි. ඒ වගේම මේ කටයුතු ඉදිරියට ගෙනයෑම වෙනුවෙන් ආර්ථික කොමිසමක් ද ඇති කරනවා. අනෙකුත් මධ්‍යම පරිමාණ සහ සුළු පරිමාණ ව්‍යාපාරිකයන් වෙනුවෙන් එන්ට්‍රප්‍රයිස් ශ්‍රී ලංකා නමින් අලුත් ආයතනයක් ඇති කිරීමට බලාපොරොත්තු වෙනවා. මේ රටේ සියලු කර්මාන්තකරුවන්ට සහාය ලබාදීම වෙනුවෙන් මේ ආයතන පද්ධතිය නිර්මාණය කරනවා. ඊළඟ වසර 5–10 තුළ අප මේ මාර්ගයේ ඉදිරියට ගමන් කළ යුතුයි.
ඒ වගේම බංග්ලාදේශය, මියන්මාරය වැනි රටවලට ගොස් එහි නිෂ්පාදන කටයුතු කිරීමට අපට අවශ්‍ය නම් ඒ පිළිබඳවද ඉදිරියේදි අවස්ථාව ලබා ගැනීමට හැකියාව තිබෙනවා. අපේ ප්‍රතිපත්තිය මෙයයි. මේ කටයුතු කරන අතරම අප ඉන්දියාව සමඟත් වැඩ කටයුතු කරගෙන යනවා. මම ඒ පිළිබඳ නරේන්ද්‍ර මෝදි අගමැති සමඟ සාකච්ඡා කළා. ඒ වගේම හෙට ඉන්දීය විදේශ ඇමැතිවරයා සමඟත් ඒ පිළිබඳ සාකච්ඡා කිරීමට බලාපොරොත්තු වෙනවා. මෙරට සූර්ය බලය සහ සුළං බලය භාවිත කිරීම සහ හරිත හයිඩ්‍රජන් ලබා ගැනීම පිළිබඳ ඉන්දියාව සමඟ සහයෝගයෙන් කටයුතු කිරීමට අපේක්ෂා කරනවා. උතුරු මුහුදේ එම වාසිය ලබා ගැනීමට අප බලාපොරොත්තු වෙනවා. අදානි සමාගම ලංකාවට පැමිණියේ එහි පළමු පියවර ලෙසයි. අප මේ නව මාර්ගයේ ගමන් කළ යුතුයි.
නමුත් හැම කටයුත්තකදීම අධිකරණයට යෑමේ සිරිතක් අපේ රටේ ඇතැම් අයට තිබෙනවා. එහි වාසිය ලැබෙන්නේ නීතිඥයන්ට පමණයි. අධිකරණයට ගිය පමණින් රට සංවර්ධනය කරන්න බැහැ. අපේ ජාතික ප්‍රතිපත්තිය අනුව අප ඉදිරියට යා යුතුයි. මේ කර්මාන්ත ඉදිරියට ගෙනයෑම වෙනුවෙන් සියලු දෙනා සාකච්ඡා කරන නව වැඩපිළිවෙළක් සකස් කරන ලෙස මා කර්මාන්ත ඇමැතිවරයාට උපදෙස් දී තිබෙනවා. ඒ කටයුතු ශක්තිමත් කිරීම වෙනුවෙන් ආර්ථික පරිවර්තන නීතිය අප පාර්ලිමේන්තුවට ඉදිරිපත් කිරීමට බලාපොරොත්තු වෙනවා.
සෞඛ්‍ය සහ කර්මාන්ත ඇමැති වෛද්‍ය රමේෂ් පතිරණ මහතා –
2022 වසර ශ්‍රී ලංකාවට ආර්ථික වශයෙන් ඉතාමත් අපහසු වසරක් වුණා. නමුත් මෙරට සියලු කර්මාන්තකරුවන් විවිධ බාධක මැද වුවද කර්මාන්ත ක්ෂේත්‍රය නඟා සිටුවීමට කටයුතු කිරීම මම ඉතා අගය කරනවා. ඒ වෙනුවෙන් ජාතියේ ප්‍රණාමය ඔවුන්ට හිමිවිය යුතුයි. වත්මන් ජනාධිපති රනිල් වික්‍රමසිංහ මහතා කර්මාන්ත ඇමැතිවරයාව සිටියදී මෙරට කර්මාන්ත ක්ෂේත්‍රය වැඩි දියුණු කිරීමට විශාල වැඩ කොටසක් ඉටු කළා. ඇඟලුම් කර්මාන්ත ශාලා ආරම්භ කිරීම සහ නිදහස් වෙළෙඳ ගිවිසුම් ඇති කර ගනිමින් මෙරට කර්මාන්ත ක්ෂේත්‍රය ප්‍රවර්ධනය කිරීමට එතුමා විශාල කැපවීමකින් කටයුතු කළා. මේ වන විට ශ්‍රී ලංකාවේ අපනයන බහුතරය සීමා වී තිබෙන්නේ ඇඟලුම් අපනයන සහ වැවිලි කර්මාන්තයට සම්බන්ධ නිෂ්පාදනවලින් පමණයි. නමුත් රටක් ලෙස අපට ඉදිරියට යෑමේදී ආහාර තාක්ෂණය, ඖෂධ නිෂ්පාදනය, අසුරුම්කරණය, මෝටර් රථ එකලස් කිරීම් ඇතුළු අංශ ගණනාවක විශාල විභවයක් තිබෙන බව මේ ප්‍රදර්ශනයෙන් පිළිබිඹු වෙනවා. ජාතියක් ලෙස අපට තිබෙන මේ ශක්තිය ඉදිරියට ගෙන යෑමට අප කටයුතු කළ යුතු අතර ජනාධිපති ඒ පිළිබඳ විශේෂ අවධානයකින් කටයුතු කරන බව කිව යුතුයි.
