මේ වන විට මාසයකට සහල් කිලෝග්‍රෑම් කෝටියකට අධික ප්‍රමාණයක් මත්පැන් නිෂ්පාදනය සඳහා එම සමාගම් මිලදී ගන්නා බව කුඩාමෝල් හිමියෝ පවසති.
සත්ත්ව ආහාර සඳහා සහල් මිලට ගැනීම තොග රැස් කිරීම ගබඩා කිරීම නීතියෙන් තහනම් වුවත් එතනෝල් නිෂ්පාදනයට සහල් යොදා ගැනීම තහනමක් නොමැත.
මෑතකදී තහනම ඉවත් කළ මත්පැන් නිෂ්පාදන සමාගමක් මාසයකට පොළොන්නරුවේ සහල් නිෂ්පාදනය කරන මෝලකින් පමණක් කිලෝග්‍රෑම් ලක්ෂයක් මිලදී ගන්නා බව වාර්තාවේ.
පොළොන්නරුවේ ප්‍රධාන ධාරාවේ ඇති සහල් මෝලකින් මෙසේ කිලෝග්‍රෑමයක් රුපියල් එකසිය තිහක මිලකට මිලදී ගන්නා අතර එම සහල් පිටි ලෙස අඹරා රැගෙන යන බව සඳහන් වේ. මෙසේ පසුගිය මාස දෙකක කාලයක සිට එතනෝල් නිෂ්පාදනය කිරීම සඳහා මෙම සමාගම සහල් රැගෙන යන බව එම මෝල් හිමියෝ පවසති. මේ ආකාරයට ප්‍රධාන පෙළේ අරක්කු හා බියර් නිෂ්පාදනය කරනු ලබන සමාගම් සිය නිෂ්පාදන සඳහා අවශ්‍ය බාර්ලි වෙනුවට සහල් යොදා ගන්නා අතර සහල් ලෙස හොඳින් පොලිෂ් කර වෙළෙඳපොළට යොමු කිරීමට වඩා මෙවැනි සමාගම්වලට ලබාදීම ලාභදායි බව එම මෝල් හිමියයෝ පවසති.
