කොළඹ උතුර අපරාධ කොට්ඨාශය කළ මෙහෙයුමකදී මට්ටක්කුලිය ප්‍රදේශයේ දී හෙරෝයින් සමඟ පුද්ගලයෙක් අත්අඩංගුවට ගෙන තිබේ.

හෙරොයින් කිලෝ 1 යි ග්‍රෑම් 71ක් සමඟ 27 හැවිරිදි පුද්ගලයෙක් එලෙස අත්අඩංගුවට ගත් බව පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පවසා සිටියේය.

අදාළ සැකකරු ගමන් ගත් මෝටර් රථය හා ඔහු සන්තකයේ තිබු මත්ද්‍රව්‍ය ජාවාරමින් උපයා ගත් රුපියල් 289,000ක මුදලක් ද පොලිස් භාරයට ගෙන තිබේ.

අත්අඩංගුවට ගත් හෙරොයින් තොගයේ වෙළෙඳපොළ වටිනාකම රුපියල් 11,000,000කට ආසන්න බව ද පොලිස් මාධ්‍ය ප්‍රකාශකවරයා සඳහන් කළේය.

මට්ටක්කුලියේ දී හෙරොයින් සමඟ අත්අඩංගුවට ගත් පුද්ගලයා පාතාල සාමාජික “චුටි උක්කුංගේ මල්ලී“ වන බව වාර්තා වේ.

මීට අමතරව රත්මලාන ප්‍රදේශයේ සිදුකළ වැටලීමකින් හෙරොයින් මත්කුඩු ග්‍රෑම් 50ක් සමඟ 25 හැවිරිදි පුද්ගලයෙක් අත්අඩංගුවට ගෙන තිබේ.

එමෙන්ම ග්‍රෑන්ඩ්පාස් පොලීසිය විසින් තොටලග ප්‍රදේශයේ සිදුකළ වැටලීමකින් හෙරොයින් ග්‍රෑම් 18ක් සමඟ 54 හැවිරිදි පුද්ගලයෙක් පොලිස් භාරයට ගෙන ඇත.

ඒ අනුව ඊයේ (28) දිනය තුළ අත්අඩංගුවට ගත් හෙරොයින්වල වෙළෙඳපොළ වටිනාකම රුපියල් එක්කෝටි විසිලක්ෂයකට ආසන්න බව ද පොලිස් මාධ්‍ය ප්‍රකාශකවරයා පැවසීය.